ბიტკოინი, როგორც მსოფლიოში ყველაზე ცნობილი კრიპტოაქტივი, ბოლო პერიოდში კვლავ ყურადღების ცენტრში მოექცა. 2025 წელს ბიტკოინის ფასმა ისტორიულ მაქსიმუმს – 126 198 დოლარს – მიაღწია, თუმცა სულ რამდენიმე თვეში სურათი მკვეთრად შეიცვალა. ამჟამად ბიტკოინის ფასი მნიშვნელოვნად არის შემცირებული და 60 000$-დან 90 000$-ის ფარგლებში მერყეობს, რაც კიდევ ერთხელ უსვამს ხაზს კრიპტობაზრის ცვალებად ბუნებას.
რა შეიძლება იყოს ასეთი მკვეთრი ცვლილების მიზეზი?
2025 წლის ოქტომბრის მონაცემებთან შედარებით ბიტკოინის ფასი 45%-ით არის შემცირებული, მსგავსი მკვეთრი ცვლილების უკან რამდენიმე მიზეზი შეიძლება იყოს. კრიპტოაქტივების ბაზარი გლობალურ ეკონომიკურ გარემოსთან მჭიდრო კავშირშია. საერთაშორისო საფონდო ბირჟებზე არასტაბილურობის ზრდასთან ერთად, ინვესტორები „მაღალი რისკის“ აქტივებში ჩადებულ კაპიტალს ამცირებენ. ინფლაციის მოლოდინები, ცენტრალური ბანკების მონეტარული პოლიტიკა და გეოპოლიტიკური დაძაბულობა ინვესტორთა განწყობაზე ზემოქმედებს, რაც ბიტკოინის ფასზეც ისახება.
მნიშვნელოვან როლს თამაშობს ბაზრის ფსიქოლოგიაც. ბიტკოინი ცვალებადი ბუნებით გამოირჩევა, რაც ნიშნავს იმას, რომ მისი ფასი მოკლე დროში შეიძლება მნიშვნელოვნად შეიცვალოს. ფასის სწრაფი ზრდა ეიფორიულ ოპტიმიზმს უდებს საფუძველს, ხოლო კლება – პანიკურ გაყიდვებს. ასეთ დროს ინვესტორების ნაწილი რისკების შემცირებას ცდილობს, რასაც აქტივის ფასზე აქვს გავლენა.
ბაზარზე ფასი კლება აისახა რიგ კომპანიებზეც, რომლებიც კრიპტოინდუსტრიაში ოპერირებენ. ცვალებადი ბაზრის პირობებში ზოგიერთი ბირჟა და კრიპტოკომპანია ხარჯებს ამცირებს, ცვლის სტრატეგიებს ან დროებით აჩერებს გაფართოების გეგმებს.
მნიშვნელოვანია აღინიშნოს ისიც, რომ ბიტკოინის ფასის ვარდნა კრიპტობაზრისთვის სიახლე არ არის. ამ აქტივის ისტორია არაერთ მკვეთრ ზრდასა და კლებას იტევს. არაერთხელ მომხდარა, როდესაც რეკორდული მაჩვენებლის შემდეგ ფასმა მნიშვნელოვანი კლება განიცადა. ზოგი ანალიტიკოსი ასეთ პერიოდებს ბაზრის ბუნებრივ ციკლად მიიჩნევს. კრიპტობაზრის ცნობილი ანალიტიკოსი და კომპანია Fundstrat-ის თანადამფუძნებელი ტომ ლი არაერთ ინტერვიუში აღნიშნავს, რომ ბიტკოინისთვის 20-30%-იანი კორექციებიც კი „ჩვეულებრივი მოვლენაა ციკლური ზრდის ფარგლებში“ და ისტორიულად ასეთი პერიოდები ბაზრის სტაბილიზაციას უსწრებს წინ.
ბიტკოინის ფასის შემცირება გლობალური ეკონომიკური ტენდენციებსა და ბაზრის შიდა პროცესების სახეა. ბიტკოინი ყურადღების ცენტრში რჩება, ხოლო ბაზარი აგრძელებს რეაგირებას როგორც ეკონომიკურ სიახლეებზე, ისე კრიპტოსფეროში მიმდინარე ცვლილებებზე.
